ތިން ފަނޑިޔާރެއްގެ ސުލޫކީ މައްސަލަ ބަލަނީ

ތިން ފަނޑިޔާރެއްގެ ސުލޫކީ މައްސަލައެއް ބެލުމަށް ކޮމިޓީއެއް އެކުލަވާލާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) ބުނެފިއެވެ.

ޖޭއެސްސީން ބުނީ ޏ.ފުވައްމުލަކު ކޯޓުގެ މެޖިސްޓްރޭޓް އަހުމަދު އަކްރަމްއާ ގުޅޭގޮތުން ބަލަނީ އޭނާ ބެލި މައްސަލައެއް ހިންގުމުގައި އެކަށީގެން ނުވާ މިންވަރަށް ލަސްވެފައިވާ ކަމަށް ބެލެވޭ މައްސަލައެއް ކަމަށެވެ.

ހދ.ކުޅުދުއްފުށި މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމްއާ ގުޅޭގޮތުން ޖޭއެސްސީން ބަލަނީ ޖަމިއްޔާއެއް އުފައްދާ އެ ޖަމިއްޔާގެ ހަރަކާތްތައް ރާވާ ހިންގުމުގައި އަމަލީ ގޮތުން ބައިވެރިވާ ކަމަށް ބުނާ މައްސަލައަކާއި ތަފްރީގުކޮށްފައިވާ ކައިވެންޏެއް ރުޖޫއަކޮށްދިން ކަމަށް ބުނާ މައްސަލައަކާއި، މުޒާހަރާތަކުގައި ބައިވެރިވެ ޝުއޫރު ފާޅުކޮށް ސޯޝަލް މީޑިއާގައި ފަނޑިޔާރަކު ހިއްސާކޮށްގެން ނުވާނެ ފަދަ ހިޔާލުތައް ފާޅުކުރާ ކަމަށް ބުނާ މައްސަލައެކެވެ.

އަދި ތ.ކނޑޫދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލީ ޝަރީފްއާ ގުޅޭގޮތުން ޖޭއެސްސީން ބަލަން ނިންމާފައިވަނީ ގާނޫނު ހުއްދަކުރާ މިންވަރަށް ވުރެ ގިނައިން ކުޑަކުދިން އަރުވައިގެން ސައިކަލް ދުއްވާ ކަމަށް ބުނާ މައްސަލައެކެވެ.