ސަރުކާރަށް ދެ އަހަރު ފުރުމުގެ މުނާސަބަތުގައި ސަންގު ޓީވީން ގެނެސްދިން ޕްރޮގުރާމެއްގައި ބައިވެރިވެވަޑައިގެން ދެއްކެވި ވާހަކަފުޅެއްގައި ފައްޔާޒު ވަނީ އޭނާ ވައްކަން ނުކުރައްވާނެ ކަމަށާއި، އޭނާއާމެދު އެފަދަ ވާހަކަތައް ދައްކަވާ ބޭފުޅުންނަށް އޭނާ ވައްކަންކުރެއްވި ނަމަވެސް އެނގިވަޑައިނުގަންނަވާނެ ކަމުގައި ވިދާޅުވެފައެވެ.
ފައްޔާޒު މިފަދައިން ވިދާޅުވެފައިވާއިރު، 2021 ވަނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓާ ގުޅޭ ބަހުސްގައި ފިނޭންސް މިނިސްޓްރީގެ ބަޖެޓު ބޮޑުކޮށްފައި އޮތުމުން ޢާޒިމް ވަނީ ފައްޔާޒަށް ފާޑުވިދާޅުވެފައެވެ.
އެ ބަހުސްގައި ޢާޒިމް ވިދާޅުވެފައިވަނީ ސަރުކާރު ކުންފުނިތައް އުފައްދައިގެން ތަފާތު ވުޒާރާތަކުގެ ބާރުތައް އިޤުތިޞާދީ ވަޒީރުގެ އަތްޕުޅަށް ނަންގަވާ ކަމުގައެވެ. އަދި އެއީ އެމްޑީޕީގެ ކަނާތުފިޔައިގެން މެދުމިން ސިޔާސަތުތަކާ ފުށުއަރާ ކަމެއް ކަމުގައިވެސް އޭނާ ވިދާޅުވިއެވެ.
އަލީ އާޒިމް ވިދާޅުވީ ވައްކަން ކުރާ ވާހަކަ ނުދައްކަނީ އެޔަށްވުރެއް ރީތިކޮށް އެކަންކަން ހައްލުކުރެވޭނެ ކަމަށް ގަބޫލުކުރާތީ ކަމަށެވެ. އަދި ބޭނުންވާ ގޮތަށް ކަންކަން ހައްލު ނުކުރެވޭނަމަ އެކަންކަން ރީތިކޮށް މަޖިލީހުގައި ކިޔާވެސް ލެވޭނެ ކަމަށް ވިދާޅުވި އެވެ.