ރައީސް އިބްރާހިމް މުހައްމަދު ސޯލިހު އިއްޔެ ދެއްކެވި ވާހަކަފުޅުން އެމަނިކުފާނަށް އަރަންޏާ ދަރަންޏާ ރިޒާވަކީ ކޯއްޗެއްކަން އޮޅުން ނުފިލާކަން ހާމަވެގެން ގޮސްފައިވަކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ ރޭ ކުރެއްވި ޓްވީޓެއްގައި ވިދާޅުވީ ރައީސް ޞާލިޙުގެ މިއަދުގެ ވާހަކައިން ކަށަވަރުވީ ކަމަކީ އެމަނިކުފާނަށް ވާނުވާ ނޭނގޭކަން ކަމަށާއި އަދި އަރަންޏާ ދަރަންޏާއި، ރިޒާވަކީ ކޯއްޗެއްކަން އޮޅުން ނުފިލާކަން ކަމަށެވެ.
“ގޮތް ހުސްވެ ހަދާނެ ނުހަދާނެ ގޮތެއް ނޭނގިގެން ތުރުތުރު އަޅާކަން. ރައްޔިތުންގެ ކުރިމަތީ ކިތަންމެ ބޮޑު ދޮގެއް ހަދަންވެސް ޖެހިލުން ނުވާކަން” އަދުރޭ ވިދާޅުވިއެވެ.
ރައީސް ޞާލިޙުގެ މިއަދުގެ ވާހަކައިން ކަށަވަރުވީ ކަމަކީ އޭނާއަށް ވާނުވާ ނޭނގޭކަން.އަރަންޏާ ދަރަންޏާ ރިޒާވަކީ ކޯއްޗެއްކަން އޮޅުން ނުފިލާކަން.ގޮތް ހުސްވެ ހަދާނެ ނުހަދާނެ ގޮތެއް ނޭނގިގެން ތުރުތުރު އަޅާކަން.ރައްޔިތުންގެ ކުރިމަތީ ކިތައްމެ ބޮޑު ދޮގެއް ހަދަންވެސް ޖެހިލުން ނުވާކަން.
— Abdul Raheem Abdulla (@Banafsaa) November 19, 2020
ހއ. ހޯރަފުށި އެއާޕޯޓު ހުޅުއްވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ ރާއްޖޭގެ ދަރަނި ބޮޑު ކަމަށާއި އެގޮތުން ކުރީގެ ރައީސް އަބްދުﷲ ޔާމީން ވެރިކަމާ ހަވާލުވެވަޑައިގެންނެވިއިރު ރާއްޖޭގެ ދަރަނި ހުރީ 26 ބިލިއަން ރުފިޔާގައި ކަމަށްވާއިރު ވެރިކަން ނިމުނުއިރު ދަރަނި ހުރީ 60 ބިލިއަން ރުފިޔާގައި ކަމަށެވެ.
އެމަނިކުފާނު ވިދާޅުވި ގޮތުގައި ދައުލަތަށް ދަރަނި ނެގުމަކީ މި ސަރުކާރުން ކުރި ކަމެއް ނޫނެވެ. އަންނަ އަހަރުގެ ބަޖެޓުގައި ހަތަރު ބިލިއަން ރުފިޔާ ޖަހާފައި އޮތީ ކުރީގެ ސަރުކާރުތަކުން ނެގި ދަރަނިތައް ދެއްކުމަށް ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވީ ދަރަނިތައް މި ސަރުކާރަށް ވާރުތަވިއިރު ދައުލަތުގެ ރިޒާވުގައި ފައިސާ ނެތް ކަމަށެވެ.