އެމްޑީޕީގެ ވިސްނުމާއި ފިކުރަކީ ވައްކަމާއި ކޮރަޕްޝަނާ ދެކޮޅުވުން ކަމަށް އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހެލްތު މިނިސްޓަރު އަބްދުﷲ އަމީންގެ މައްޗަށް އިތުބާރު އެބައޮތް ކަމަށް އެމްޑީޕީގެ ޕާލިމަންޓަރީ ގުރޫޕުން ނިންމާފައިވަނިކޮށް އެ ނިންމުމާ ދެކޮޅު ހަދާ އަމީންގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް މިއަދު ވަނީ ހުށަހަޅާފައެވެ.
މިކަމާ ގުޅިގެން ހަސަން ލަތީފް ކުރެއްވި ޓްވީޓެއްގައި ވިދާޅުވީ އެމްޑީޕީގެ ފިކުރަކީ އަދި ވިސްނުމަކީ ވެސް ވައްކަމާއި ކޮރަޕްޝަނާ ދެކޮޅުވުން ކަމަށާއި އެއީ ޕާޓީގެ ތޮބިއްޔަތެއް ކަމަށެވެ. އަދި އޭނާގެ އިތުބާރު އަމީނަށް މިހާރު ނެތް ކަމަށްވެސް ހަސަން ވިދާޅުވިއެވެ.
@MDPSecretariat ge visnumakee fikurakee vakkamaa corruption aa dhekolhuvun. E ee mi partyge thobiyyath. Minister Ameen ah Alhuganduge ithubaareh neiy. pic.twitter.com/ImgcOYUnqO
— Hassan Latheef???? (@HassanLatheef) October 20, 2020
އެމްޑީޕީގެ ގިނަ މެމްބަރުންތަކެއް ވަނީ އަމީންގެ އިތުބާރު ނެތްކަމުގެ މައްސަލަ ހުށައަޅާ ގަރާރުގައި ސޮއިވެސް ކޮށްފައެވެ. އެ މެމްބަރުން އެ މަަސައްކަތް ފަށާފައިވަނީ އެމްޑީޕީގެ ޕީޖީގެ ނިންމުމާ ދެކޮޅަށެވެ.
އިތުބާރު ނެތް ކަމުގެ ގަރާރުގައި ސޮއިކުރެއްވީ 24 މެމްބަރުންނެވެ. އަދި އެ މަސައްކަތުގައި އިސްކޮށް ތިބީ މިއަދު އޮތް ޕީޖީ ބައްދަލްވުމުގައި އަމީން ވަކިކުރަން ޖެހޭ ކަމަށް ވިދާޅުވި މެމްބަރުންނެވެ.