އަނގޮޅިތީމު ބަނދަރު ތަރައްޤީ ކުރުމުގެ މަޝްރޫޢު އެމްޓީސީސީ އާއި ހަވާލުކޮށްފި

ރ. އަނގޮޅިތީމު ބަނދަރު ތަރައްޤީ ކުރުމުގެ މަޝްރޫޢު އެމްޓީސީސީ އާއި ހަވާލުކޮށްފިއެވެ.

ޕްލޭނިން އެންޑް ހައުސިން މިނިސްޓްރީގައި މިއަދު އެކަމަށްޓަކައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން އެކަމުގެ އެއްބަސްވުމުގައި ސޮއިކުރެއްވީ ޑިރެކްޓާ ޖެނަރަލް ފާތިމަތު ޝާނާ ފާރޫގެވެ. އަދި އެމްޓީސީސީގެ ފަރާތުން ސޮއި ކުރެއްވީ އެކުންފުނީގެ ސީއީއޯ އާދަމް އާޒިމް އެވެ.

މި މަޝްރޫޢަކީ 44.31 މިލިއަން ރުފިޔާގެ މަޝްރޫޢެކެވެ. މި މަސައްކަތް އެއްކޮތް ނިންމާލެވޭނެ ކަމަށް ލަފާ ކޮށްފައިވަނީ 365 ދުވަހުގެ ތެރޭގައެވެ.

އަނގޮޅިތީމު ބަނދަރު އަޕް ގްރޭޑް ކުރުމުގެ މަޝްރޫޢުގައި ބޭރު ތޮށީގައި 221 މީޓަރުގެ ބޮޑުހިލަ ޖެހުމާއި 9144 މީޓަރުގެ އެއްގަމު ތޮށި ލުމާއި 12 ބަނދަރު ބައްތި ޖެހުމާއި 1110 ސްކެއަރ މީޓަރުގެ ޕޭވްމެންޓު ހެދުން ހިމެނެ އެވެ.

މީގެ އިތުރުން 5 މޫރިންގ ބްލޮކސް ޖެހުމާއި 42،000 ކިއުބިކް މީޓަރަށް ބަނދަރު ފުން ކުރުމާއި 615 ކިއުބިކް މީޓަރަށް ނެރު ފުން ކުރުމާއި 2 ނެރު ބައްތި ޖެހުމާއި 166 މީޓަރު ރިވެޓްމެންޓު ޖެހުން ވެސް މި މަޝްރޫޢުގައި ހިމެނެ އެވެ.