މި އަންނަ އަހަރު މާލެ ސިޓީ ސަރަހަށްދުގައި އާ ސްކޫލެއް ހުޅުވުމަށް މިނިސްޓްރީ އޮފް އެޑިޔުކޭޝަންއިން ހާމަކުރަށްވައިފިއެވެ.
މާލޭ އިންގްލިޝް ސްކޫލް (އެމްއީއެސް) ކުރިންހުރި ސަރަހަށްދުގައި ” ޢިއްޒުއްދީން ސްކޫލް”ގެ ނަމުގައި 2020 ވަނަ އަހަރު ސްކޫލެއް ހުޅުވަން ހަމަޖެހިފައިވެއެވެ.
މިއީ ސިންގަލް ސެޝަން ސްކޫލެއްގެ ގޮތުގައި ގްރޭޑް 1 އިން 10 އަށް ކިޔަވައިދޭން ހަމަޖެހިފައިވާ ސްކޫލެކެވެ. ނަމަވެސް މިއަންނަ އަހަރު މި ސްކޫލުގައި ކިޔަވައިދޭން ފަށާނީ ގްރޭޑް 1 އިން 6 އަށެވެ. އެއީ ގްރޭޑް 1 އިން 4 އަށް ކޮންމެ ގްރޭޑެއްގައި 3 ކުލާހާއި ގްރޭޑް 5 އަދި 6 ގައި ކޮންމެ ގްރޭޑެއްގައި 2 ކިލާހެވެ. ކޮންމެ ކިލާހެއްގައިވެސް 25 ދަރިވަރުންނަށް ކިޔަވައިދެވޭގޮތަށް އިންތިޒާމް ކުރެވޭނެއެވެ.
މި ސްކޫލު ގްރޭޑް 7 އިން 10 އަށް ތަރައްގީ ކުރަން ހަމަޖެހިފައިވަނީ 2021 ވަނަ އަހަރުން ފެށިގެން ކޮންމެ އަހަރަކުވެސް ގްރޭޑެއް އިތުރު ކުރާގޮތަށެވެ.
މި ސްކޫލަށްވެސް ކުދިން ވެއްދުމުގައި މާލޭ ސިޓީ އެހެން ސްކޫލްތަކަށް ކުދިން ވެއްދުމުގައި ގެންގުޅޭ އުސޫލު ބޭނުންކުރެވޭނެ ކަމަށް މިނިސްޓްރީ އޮފް އެޑިއުކޭޝަންއިން މައުލޫމާތުދެއެވެ. މި ސްކޫލަށް ދަރިވަރުން ވެއްދުމަށް މިހާރުވެސް މިނިސްޓްރީ އޮފް އެޑިއުކޭޝަންއިންދަނީ ސިޓީ ބަލައިގަންނަމުންނެވެ. ސްކޫލަށް ދަރިވަރުން ވެއްދުމަށް ހަމަޖެހިފައިވަނީ ސިޓީ ހުށަހަޅާ ތަރުތީބުންނެވެ.
advertisment