ޑިފެންސް މިނިސްޓަރ މާރިޔާ އަޙްމަދު ދީދީ ޖަޕާނުގެ މެރިޓައިމް ސެލްފް ޑިފެންސް ފޯސްގެ މަނަވަރެއް ކަމުގައިވާ “ޖޭއެމްއެސްޑީއެފް ޓަކަޝިމާ” އަށް ޒިޔާރަތްކުރައްވައިފިއެވެ.
ޖަޕާނުގެ މަނަވަރަށް ޑިޕެންސް މިނިސްޓަރ ވަޑައިގެންނެވުމުން އެކަމަނާގެ ޝަރަފުގައި އެ މަނަވަރުން ވަނީ އޮނަރގާޑެއް އަރުވާފައެވެ. އަދި މަނަވަރާ ބެހޭގޮތުން ޑިފެންސް މިނިސްޓަރަށް ވަނީ މަޢުލޫމާތު އަރުވާފައެވެ.
ޖަޕާނުގެ މަނަވަރަށް ޑިފެންސް މިނިސްޓަރ މިކުރެއްވި ޒިޔާރާތުގައި މިނިސްޓަރުގެ އަރިހުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލާއި ކޯސްޓްގާޑްގެ ކޮމަޑާންޓް ކާނަލް މުޙައްމަދު ސަލީމާއި ފަޔަރ އެންޑް ރެސްކިއު ސަރވިސްގެ ކޮމަޑާންޓް ކާނަލް ޢަބްދުﷲ އިބްރާހީމްގެ އިތުރުން އެމްއެންޑީއެފް މާލެ އޭރިއާގެ ކޮމާންޑަރ ކާނަލް ޢަބްދުއްރަޢޫފް ވެސް ބައިވެރިވެ ވަޑައިގެންފައިވެއެވެ.
ޖަޕާނުގެ ދެ މަނަވަރު ރަޙުމަތްތެރިކަމުގެ ދަތުރެއްގައި ރާއްޖެ އައިސްފައި ވަނީ މިމަހުގެ 15 ވަނަ ދުވަހު ތިން ދުވަހުގެ ދަތުރެއްގައެވެ.
advertisment