ގިނަ މަޝްރޫޢުތައް އެއްފަހަރާ ބާރު ސްޕީޑްގައި ކުރިޔަށްގެންދެވި ނަމަވެސް މަޝްރޫޢުތަކުގެ ފެންވަރު ވަޒަންކޮށް ރަނގަޅަށް މޮނިޓަރކޮށްގެން ކުރިޔަށްގެންދިއުމަށް ރައީސުލްޖުމުހުރިއްޔާގެ ނައިބު ފައިސަލް ނަސީމް އެދިވަޑައިގަންފިއެވެ.
ނައިބު ރައީސް އެފަދައިން ވިދާޅުވީ ދުވަހު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ގެ އިސްވެރިންނާއި އާދިއްތަ ދުވަހު ބައްދަލުކުރައްވައި، ކުރެއްވި މަޝްވަރާގެ ތެެެރެއިންނެވެ.
އެމްޓީސީސީގެ ފަރާތުން ވަނީ މަޝްރޫޢުތައް ކުރިޔަށް ގެންދާއިރު ފެންވަރު ހިފެހެއްޓުމާއެކު ބާރު ސްޕީޑްގައި މަސައްކަތް ކުރިޔަށް ގެންދިއުމަށް ސަމާލުކަން ދީގެން މަސައްކަތްތައް ކުރިޔަށް ގެންދާނެކަމުގެ ޔަޤީންކަން ނައިބު ރައީސްއަށް ދެއްވާފައެވެ.
އެމްޓީސީސީގ އިސްވެރިންނާއި ބައްދަލުކުރައްވައި ނައިބު ރައީސް ވަނީ އެ ކުންފުނީގެ މަސައްކަތްތަކާއި ގުޅޭ މައުލޫމާތު އޮޅުންފިލުވާފައެވެ.
މީގެއިތުރުން އެ ބައްދަލުވުމުގައި އެމްޓީސީސީގެ އިސްވެރިން ވަނީ އެ ކުންފުނިން ރާއްޖޭގެ އެކި ކަންކޮޅުތަކުގައި ހިންގަމުންގެންދާ މަޝްރޫޢުތަކާބެހޭ މަޢުލޫމާތު ނައިބު ރައީސްއާއި ހިއްސާކުރައްވާފައެވެ.
advertisment