ސުޕްރީމް ކޯޓުގެ ފަނޑިޔާރު އަބްދުﷲ ދީދީ (ޑީޑީ) ގެ ސުލޫކީ މައްސަލަ ސާބިތުވާ ކަމަށް ނިންމައި މަގާމުން ވަކިކުރަން ރައްޔިތުންގެ މަޖިލިހުން މިއަދު ފާސްކޮށްފި އެވެ.
ކްރިމިނަލް ކޯޓާއި ހައި ކޯޓުގައި ކުރިން މަސައްކަތް ކުރެއްވި ޑީޑީ ވަކިކުރަން މަޖިލިހުން ނިންމީ ވޯޓުގައި ބައިވެރިވެވަޑައިގެންނެވި 72 މެމްބަރުންގެ އިއްތިފާގުންނެވެ.
އެކަމަކު އިތުބާރު ނެތްކަމުގެ ވޯޓު ނެގުމާ ގުޅޭގޮތުން ސުޕްރީމް ކޯޓުން 2017 ގައި ކޮށްފައިވާ ހުކުމުގައިވާ ގޮތުން ރައީސާއި ނައިބު ރައީސާއި ވަޒީރުންގެ އިތުރުން މިނިވަން މުއައްސަސާތަކުގެ ވެރިންނާއި ފަނޑިޔާރުން މަގާމުން ވަކިކުރަން މަޖިލީހުން ފާސް ކުރިޔަސް، އެކަމުގައި ފަސް ބަސް ބުނާނީ ސުޕްރީމް ކޯޓުންނެވެ.
މިއީ ޖޭއެސްސީ އިން ބަލަމުން އައި މައްސަލައެއް ސާބިތުވެގެން ސުޕްރީމް ކޯޓުގެ ފަނޑިޔާރެއް މަޖިލިހުން ވަކިކުރަން ނިންމި ފުރަތަމަ ފަހަރެވެ. މީގެކުރިން ގދ. ތިނަދޫ ކޯޓުގެ މެޖިސްޓްރޭޓް އިބްރާހިމް ރަޝީދުގެ ސުލޫކީ މައްސަލަ ސާބިތުވާ ކަމަށް ޖޭއެސްސީން ނިންމުމާ ގުޅިގެން މަޖިލިހުން އޭނާ ވަނީ ވަކިކޮށްފަ އެވެ.