މިނިސްޓަރ އޮފް ހައުސިން އެންޑް އިންފްރާސްޓްރަކްޗަރު މުޙައްމަދު އަސްލަމް މާދަމާގެ މަޖިލީހަށް ހާޒިރު ކުރުމަށް އެޖެންޑާކޮށްފިއެވެ.
މާދަމާގެ ޖަލްސާގައި ދެމެމްބަރަކު ވަނީ އަސްލަމްްއާއި ސުވާލުކުރުމަށް އެދިވަޑައިގެންފައެވެ. އެހެންކަމުން މާދަމާ ގަޑިއެއްހާއިރު ވަންދެން އަސްލަމް މަޖިލީހުގައި މެމްބަރުން ކުރައްވާ ސުވާލުތަކަށް ޖަވާބު ދެއްވާނެއެވެ.
އަސްލަމްއާއި ފުރަތަމަ ކުރައްވާ ސުވާލު ކުރައްވަނީ ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމް އެވެ. އޭނާ ކުރައްވާ ދެ ސުވާލަކީ ށ. ބިލެތްފަހި ބަނދަރުގެ މަސައްކަތް ލަސްވާ ސަބަބާއި އެ ބަނދަރުގެ މަސައްކަތް ފެށޭނެ ތާރީހެވެ.
އަސްލަމްއާ މާދަމާ ދެން ސުވާލު ކުރެއްވުމަށް ހަމަޖެހިފައި ވަނީ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަތީފްއެވެ. އޭނާ ކުރައްވާ ސުވާލަކީ ގދ.ފަރެސްމާތޮޑާ ދާއިރާއަކީ ގިނަ ބަޔަކު މަސްވެރިކަމުން ނަފާ ހޯދަމުން އަންނަ ދާއިރާއެއް
ކަމުގައިވާއިރު، އިޤްތިޞާދީ ތަފާތު މަސައްކަތްތައް ފުޅާކުރުމުގެ ގޮތުން އެ ދާއިރާގައި އެއާޕޯޓެއް އުޅެމަށް ކުރެވޭ މަސައްކަތާ މެދުއެވެ. އަދި އެއާޕޯޓު ބަޔަކާ ހަވާލުކުރެވޭނީ ކޮންއިރަކުތޯ އާއި އަދި ޢަމަލީ މަސައްކަތް ފެށި މަސައްކަތް ނިމެނީ ކިހާ ދުވަހަކުންތޯއެވެ.