މާލޭގައި މަގުމަތިވެފައި ތިބި މީހުންނަށް ވަގުތީ ބޯހިޔާވަހިކަމެއް ހޯދާދިނުމަށް ސަރުކާރުން އެމީހުން ގުޅިފަޅަށް ބަދަލުކުރުމަށް ނިންމައިފިއެވެ.
މި ނިންމުން ނިންމާފައިވަނީ ނެޝަނަލް ޑްރަގް އޭޖެންސީ(އެންޑީއޭ) އިން ބޭއްވި ބޯޑު ބައްދަލުވުމަކަށް ފަހުގައެވެ.
އެންޑީއޭގެ ޗެއާމަން އަބްދުލް ހަމީދާ ހަވާލާދީ ބައެއް މީޑިއާ ތަކުގައި ރިޕޯޓް ކޮށްފައިވާ ގޮތުގައި ވަންނާނެ ތަނެއް ނެތް މީހުން ފުރަތަމަ ބަލަން ޖެހޭ ބެލުންތައް ބެލުމަށް ގެންދާނީ ގުޅި ފަޅަށެވެ.
އަދި އެންޑީއޭއިން ބެލުމަށް ފަހު އެމީހުންގެ ތެރޭގައި މަސްތުވާތަކެއްޗާ ގުޅިފައި ތިބި މީހުން، ފަރުކޮޅުފުށީގައި ހުރި ޑިޓޮކްސް ސެންޓަރަށް ގެންގޮސް އެތަނުން ފަރުވާދިނުމަށްވަނީ ހަަމަޖެހިފައެވެ.
މިކަމާ ގުޅޭގޮތުން ޖެންޑާ މިނިސްޓްރީން ބުނެފައިވަނީ ގުޅިފަޅަށް ގެންދާނީ ބޯހިޔާވަހިކަމެއް ނެތް މީހުންގެ ރުހުން ލިބުމުން ކަމަށެވެ.
ކޮވިޑް 19 ގެ ސަބަބުންނާއި އެހެނިހެންވެސ ސަބަބުތަކާއި ހުރެ ބޯހިޔާވަހިކަމެއް ނެތް އެތައްބަޔަކު ދަނީ މާލޭގެ މަގުތަކާއި އެކި ސަރަހައްދުތަކުގައި ދިރިއުޅެމުންނެވެ.