ރުގްޔާގެ ނަމުގައި އަނިޔާ ލިބެމުންދިޔަ ހަތަރު މައިންގެ ރައްކާތެރިކަން ކަށަވަރު ކުރުމަށް މަސައްކަތް ކުރަމުންދާ ކަމަށް ޖެންޑާ މިނިސްޓްރީން ބުނެފި އެވެ.
“މިހާރު” ނޫހުން ރިޕޯޓު ކޮށްފައިވާ ގޮތުގައި މެދުރާއްޖެ ތެރޭގެ ރަށެއްގައި މިދިޔަ އޮގަސްޓް މަހުން ފެށިގެން މަންމަ އާއި ތިން ކުދިން ގޭތެރޭގައި ބަންދުކޮށް ތިން މަސް ދުވަސްދެން ވަނީ ގެންގުޅިފައެވެ. އެ ނޫހުގައި ވާގޮތުން އެ މީހުންނަށް ސަލާމަތްވެވުނީ މިދިޔަ މަހުގެ 30 ގަ އެވެ. އަނިޔާގެ ތުހުމަތުކުރަނީ ފަހުން ކައިވެނިކުރި އޭނާގެ ފިރިމީހާ އާއި އެ ރަށުގެ ރުގްޔާ ކުރާ މީހަކަށެވެ.
މި މައްސަލާގައި މިރޭ ޖެންޑަ މިނިސްޓްރީން ކުރި ޓުވީޓެއްގައި ބުނެފައިވަނީ މި މައްސަލައިގަ އަނިޔާ ލިބިފައިވާ ފަރާތްތަކަށް އިޖްތިމާއީ އެހީތެރިކަން ދެމުންދާ ކަމަށެވެ. އަދި ރައްކާތެރިކަން ކަށަވަރު ކުރުމަށް އެ އާއިލާ އާއި އެކު އެ މިނިސްޓްރީން މަސައްކަތް ކުރަމުންދާ ކަމަށް ބުންޏެވެ.
"mahsalaigai aniyaa libifaivaa faraahthakah beynunvaa ijthimaaee eheetherikan dhinumaai rakkaatherikan kashavarukurumah ministry in dhany aailaa aai eku masaikai kuramun". https://t.co/5Xaxo2Z9Us
— Ministry of Gender, Family and Social Services (@MoGFSSmv) November 24, 2020
މި މައްސަލަ ފުލުހުން ދަނީ ތަހުގީގު ކުރަމުންނެވެ. ޖެންޑާ މިނިސްޓްރީން ބުނީ ތަހުގީގަށް އެ މިނިސްޓްރީެ ފަރާތުން ދޭންޖެހޭ އެއްބާރުލުމާއި އެހީތެރިކަން ފޯރުކޮށްދެމުންދާ ކަމަށެވެ.