ސްޓެލްކޯ އިން މާލެ އާއި ހުޅުމާލޭގައި ލެޑް ލައިޓު ބަހަން ފަށައިފި!

ސްޓެލްކޯ އިން މާލެ އާއި ހުޅުމާލޭގައި ލެޑް ލައިޓުތައް ހިލޭ ބަހަން ފަށައިފި އެވެ.

މިއަދު ހެނދުނު 9:30 އިން ފެށިގެން ހަވީރު 5:30 ގެ ނިޔަލަށް ކުރިއަށް ގެންދާ މި ހަރަކާތް މާލޭގެ 10 ސަރަހައްދެއްގަ އާއި ހުޅުމާލޭގެ ހަތަރު ސަރަހައްދެއްގައި ކުރިއަށްދާނެ އެވެ. މި ތަންތަނަށް ޒިޔާރަތް ކުރާ މީހުން ގެންދާ ކޮންމެ އައިޑީ ކާޑަކަށް ހަތަރު ލެޑް ލައިޓު ލިބޭނެ އެވެ. ކޮންމެ މީހަކަށް ގެންދެވޭނީ ގިނަ ވެގެން ދެ އައިޑީ ކާޑެވެ.

ސްޓެލްކޯ އިން ވަނީ ލެޑް ލައިޓްތައް ބަލައި އަންނަ އިރު ކޮތަޅެއް ގެނައުމަށް އެދިފަ އެވެ. މިއީ އެއްފަހަރާ ބޭނުންކޮށްލުމަށް ފަހު އުކާލާ ކޮތަޅުތައް މަދު ކުރުމުގެ ގޮތުން އެ ކުންފުނިން ނިންމި ނިންމުމެއް ކަމަށް ސްޓެލްކޯ އިން ބުންޏެވެ.

މިއީ، އާންމުން ދިރިއުޅޭ ހުރިހާ ގެއަކަށް ހަދިޔާ ކުރުމަށް ސަރުކާރުގެ ފަރާތުން ބަހާ ލައިޓުތަކެކެވެ. އެހެންކަމުން މިއަދުގެ 5:30 ގެ ފަހުން ވެސް ލައިޓުތައް ހުސްވަންދެން ބަހާނެ ކަމަށް ސްޓެލްކޯ އިން ބުންޏެވެ.

ސްޓެލްކޯ އިން ވަނީ މިދިޔަ އަހަރު ވެސް ދެ ފަހަރެއްގެ މަތިން މާލޭގައި ލެޑް ލައިޓް ބަހައިފަ އެވެ.