ރާއްޖެ ސަރަޙައްދުން އިރާނުގެ ބޯޓެއް އަނެއްކާވެސް ފެނިއްޖެ

ރާއްޖޭގެ ކަނޑުގެ ސަރަހައްދުން އިރާނުގެ ބޯޓެއް ފެނިގެން އެ ބޯޓުގައި ފުލުހުން ހަރަކާތްތެރިވާން ފަށައިފިއެވެ.

ފުލުހުން ބުނީ އދ. މަންދޫއާއި ދިމާލުން ބޭރުގެ ލަކުޑި ބޯޓެއް އިންޖީނު ހުއްޓިގެން އޮޔާދާކަމުގެ މަޢުލޫމާތު މިއަދު ހެނދުނު 08:20 ކަންހާއިރު ފުލުހުންނަށް ލިބުނު ކަމަށެވެ. މި ބޯޓުގެ މަޢުލޫމާތު ލިބުމުން ފުލުހުން އެސަރަހައްދަށް ގޮސް އެ ބޯޓަށް އަރާ ބެލިއިރު އެއީ އިރާނުގެ ބޯޓެއްކަން އެނގިފައިވާ ކަމަށެވެ.

އެ ބޯޓުގައި އިރާނުގެ 7 މީހުން ތިބި ކަމަށް ފުލުހުންބުނެއެވެ. އަދި މިޙާރު އެ ބޯޓާއި ގުޅޭ ކަންކަން ބަލަމުން އަންނަ ކަމަށެވެ.

މީގެ ކުރިންވެސް ރާއްޖޭގެ ކަނޑުގެ ސަރަޙައްދުން ބޭރުގެ ބޯޓުތައް ފެނެއެވެ. ދާދި ފަހުންވެސް ވަނީ އިރާނުގެ ބޯޓެއް 150 ކިލޯގެ މަސްތުވާތަކެއްޗާއެކު އަތުލައިގަނެފައެވެ.