އެމް.ޑަބްލިޔު.އެސް.ސީގެ ނަމުގައި މީސްމީޑިއާގައި ފޭކް ޓްވިޓަރ އެކައުންޓެއް ހަދައިގެން ކުންފުނީގެ ނަމުގައި ޓްވިޓަރ ބޭނުންކުރާ ބައެއް ފަރާތްތަކާއި މުއާމަލާތު ކުރަމުން ގެންދާތީ ސަމާލުވުމަށް އެ ކުންފުނިން އިލްތިމާސް ކުރައްވައިފިއެވެ.
އެމް.ޑަބްލިޔު.އެސް.ސީ އިން ނެރުނު ނޫސް ބަޔާނެއްގައި ބުނެފައިވަނީ އެ ކުންފުނީގެ ރަސްމީ ޓްވިޓަރ ހެންޑަލް އާ އެއްގޮތް ފޭކް އައި.ޑީ އެއް ހަދައިގެން ބައެއް ފަރާތްތަކާއި މުއާމަލާތް ކުރަމުންގެންދާކަން ފާހަގަކުރެވިފައިވާ ކަމަށެވެ.
މީގެއިތުރުން އެ ފޭކް ޓްވިޓަރ އެކައުންޓުން އެމް.ޑަބްލިޔު.އެސް.ސީގެ ނަމަށާއި އަބުރަށް ހުތުރުވާ ގޮތަށް ޓްވީޓްތަކަށް ޖަވާބު ދެމުން ދާކަމަށްވެސް އެ ބަޔާނުގައި ބުނެފައިވެއެވެ.
އެ ކުންފުނީގެ ރަސްމީ ޓްވިޓަރ އެކައުންޓުން ބޭއަދަބީކޮށް އެއްވެސް ފަރާތަކާއި މުއާމަލާތް ނުކުރާނެ ކަމަށާއި އެ ފޭކް އައިޑީ އަށް ސަމާލުވުމަށް ކުންފުނީގެ ހުރިހާ ކަސްޓަމަރުންނަށް އިލްތިމާސް ކުރާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ސަރުކާރުގެ ވުޒާރާތައް އަދި ބޮޑެތި ކުންފުނިތަކުގެ ނަމުގައި މީސްމީޑިއާގައި ފޭކް އެކައުންޓްތައް ހުޅުވައިގެން މުއާމާލާތް ކުރުމުގެ މައްސަލަތައް ވަނީ މީގެ ކުރިންވެސް ފެންމަތިވެފައެވެ.